Центральная библиотека г.Агрыз
Үзәк китапханәдә яңа китап күргәзмәсе.
"Учактай кабыздым җанымны" исемле китап күргәзмәсе Татарстанның халык язучысы Марсель Галиевка 80яшь тулуга багышлана. Күргәзмәдә сез авторның әсәрләре, тормыш һәм иҗат юлына багышланган материаллар белән таныша аласыз.
Марсель Баян улы Галиев 1946 елның 8 октябрь көнендә Азнакай районы Балтач авылында туган. Үз районындагы татар урта мәктәбен тәмамлаганнан соң, берникадәр вакыт төзү–монтаж идарәсендә эшли. - елларда хезмәт итә, анда кече авиабелгечләр хәзерли торган хәрби мәктәпне тәмамлый. 1969 елда Марсель Галиев Казан дәүләт университетының журналистика бүлегенә укырга керә; 1974 елдан 1983 елга кадәр Татарстан Язучылар берләшмәсендә әдәбиятны пропагандалау бюросында әдәби хезмәткәр һәм «Казан утлары» журналы редакциясендә проза бүлеге редакторы булып эшли.
Марсель Галиев шигърият һәм проза жанрында иҗат итә. Матбугатта аның әсәрләре 70нче еллар башында күренә башлый. 1979 елда «Еллар чалымы» исеме белән мөстәкыйль шигырьләр җыентыгы, ә 1980 елда ике повестен эченә алган «Ул чакта» исемле проза китабы дөнья күрә. Аның әсәрләре, кагыйдә буларак, интеллектуаль укучыны күздә тотып языла һәм ассоциатив чагыштыруларга, яңача көтелмәгән образлы тәгъбирләргә бай булуы белән аерылып тора.
40ка якын китап авторы.
М. Галиевнең аерым әсәрләре рус, поляк, украин, үзбәк, казакъ,каракалпак, осетин, чуаш телләренә тәрҗемә ителә.
Ул – Г. Исхакый, Г. Державин, Г. Афзал исемендәге әдәби бүләкләр иясе.
1993 елдан М.Галиев «Татарстанның атказанган сәнгать эшлеклесе» дигән мактаулы исем йөртә, ә 1996 елда татар әдәбиятын үстерүгә зур өлеш керткәне өчен Татарстан Республикасы Президенты М.Ш.Шәймиев Указы нигезендә Татарстан Республикасының Мактау грамотасы белән бүләкләнә. 2006 елда ул Татарстан Республикасының Г.Тукай исемендәге Дәүләт премиясенә, 2012 елда Татарстанның халык язучысы исеменә лаек була.
М.Галиев – 1979 елдан СССР (Татарстан) Язучылар берлеге әгъзасы
