Китапханәгә бүләк

Районыбызның горурлыгы, яраткан язучыбыз, Таҗи Гыйззәт исемендәге премия лауреаты, күп кенә әдәби бәйгеләр җиңүчесе Наилә Харисованың 4нче "Ачы җимеш" китабы дөнья күрде. "Татарстан китап нәшриятында" 2000 данәдә басылып чыккан китап укучылар күңеленә хуш килер дип уйлыйбыз. "Ачы җимеш" китабында авторның соңгы елларда иҗат ителгән повесть һәм хикәяләре тупланган.

Халыкара туган тел көнендә Наилә ханым китапханәгә китабын бүләк итте.

Бүген Л. Айтуганов мәдәният йортында "табадан төшкән" китапны шәһәребезнең аскы өлешендәге укучыларга тәкъдим итү, таныштыру оештырылды. Укучылар зур кызыксыну белән "Гаеплеме мин?" хикәясен тыңладылар.

Наилә Харисовага алга таба да иҗади уңышлар, яңа әдәби җиңүләр, саулык-сәламәтлек телибез. Безне яңа әсәрләре белән сөендереп торуын теләп калабыз.

Р. S. Авторның "Гаеплеме мин?" хикәясе белән шулай ук "Мәйдан" журналының 2нче санында танышырга мөмкин.