Күргәзмә «Үзенчәлекле моң иясе»
Якташ шагыйрь һәм композитор Әнвәр Закир улы Закировның тууына 95 ел уңаеннан үзәк китапханәдә «Үзенчәлекле моң иясе» исемле күргәзмә оештырылды. Биредә китап укучылар аның җыентыклары, аның турында истәлекләр, мәкаләләр белән таныша алалар.
Шагыйрь һәм композитор, озак еллар буе бик күп җәмәгать эшләрен яшьләрчә дәрт һәм илһам белән башкарган Әнвәр Закировны безнең районда бик күпләр белә һәм ярата иде.
Ул элеккеге Бондюг (хәзерге Менделеев) районының Песәй авылында 1930 елның 11 мартында туа. Әнвәргә бары тик 6 яшь кенә булганда ятим кала. Аны абыйсының гаиләсе тәрбияләп үстерә, белем бирә.
1945 елда ул җиденче класстан соң Алабуга педагогия училищесына укырга керә, аннары укытучылар институтында укый, аны тәмамлагач Актаныш районының Чат авылында эшли башлый. 1951-1953 елларда ул армия сафларында була, аннан соң ул үз районының Тойма авыл мәктәбендә укыта башлый.
Ә инде 1955 елдан башлап аның тормышы Әгерҗе районы белән бәйләнә. Ул гаиләсе белән Кырынды авылына күченеп килә һәм башта укытучы, аннары директор булып эшли. Аннары аны колхоз парторгы итеп сайлыйлар.
1970-1973 елларда ул КПССның Әгерҗе районында эшли. Ә инде 1982 елда Әнвәр Закировны районның мәдәният бүлеге мөдире итеп куялар. 1987 елдан алып пенсиягә чыкканчы ул Әгерҗе районының «Җиңү юлы» газетасы редакциясендә эшли.
Әнвәр яшьтән үк музыканы, әдәбиятны ярата, үзе баянда уйнарга өйрәнә. Уку елларында ул шигырьләр яза башлый. Соңрак аның җырлары һәм шигырьләре аерым китап булып та басылып чыктылар. «Син — минем йолдызым» шигырьләр җыентыгы 1997 елда дөнья күрә. «Үз моңым бар җирдә», «Күңел чишмәләре» җыентыкларында да шигырьләре басыла.
Әнвәр Закир улы Закиров 1997 елда вафат булды. Районыбызның мәдәни тормышында ул якты эз калдырды.
